Catatan Harianku (483)
Mak-adang.com, JAKARTA.
La tasabuik di sado suduik balai sijak tuak palo mamarinta tigo kali rirayo banyak garundang nan maeboh.
Mulonyo raso indak masuak diaka baa binatang aia luda setan ko bisa bacaran bak urang kampuang barabuk aia atau bacakak barabuk sawa di nagari karamek.
Mak Adang nan bakutat jo surek kaba pagi jo patang bakoruk koniang de ula garundang du.
Aa garundang kok iyo. Manuruk ilmu nan tarado atau nan lazim garundang binatang ketek nan kapalo gadang ikua ketek bantuak anak pantau. Atau anak ikan tali tali di solo solo batu di baliak sungai joriang.
Walo kapalo godang indak bararti utak bonaknyo barisi bak urang santiang basakola. Garundang hanyo pandai mengacau di aia nan janiah apolagi kalau tanah jo aia tu jole jole inyo manumpang. Niniak moyangnyo ondak ado sajarah di tampek nyo mangacau tu.
Bilo inyo saketek mako inyo pandai baranang bak ikan. Babelok suok kida maempa kinyak kamari sabana sarupo anak ikan. Bakeh sayanglah induak ikan ka inyo.
Tapi kalo la banyak garundang di satu tobek, apolagi maraso inyiak balai panjago tobek sayang ka nyo.. mako dipatoknyo sado tanah jo air. Walau tadi inyo manumpang.
Garundang sabana kalera. Memang.
Tasobuk bantuak iko kini mamang poniang kapalo ninik mamak. Tasabab Garundang la tibo mamihak ka tuak palo.
Asa nan disobuk tuak palo ji karajo nan remeh temeh basoraklah garudang dalam tobek baso rancak ko santiang tuak palo ko.
Bialah sabana basaiang gigi tuak palo.. garundang manyobuk itulah waja nan paling gagah sadunie ko.
Kutiko tuak palo mandatangan puluk jo padi mura dari nagori lain, garundang indak tau itu karojo sosek. Siko audah manyabik, banyak bore ho puluk baa ko tuak palo impok. Inpok lawanyo eskpok. Mustinyo manjuo iko mamboli.
Katuju gilo pado kayo. Oii tuak dima baguru… poruk tuak surang se nan kadiisi. Rakyaik badarai tapakiak nda laku bore he.
Garundang kutiko tu la konyang bantuak ula sudah malulu saikua kondiak. Indak kalu kalua dari lubang.
Baitu pulo kutiko bepeer panyimpan piti bagori. Dek urang baa ka batamba modalnyo. Drk tuak palo bajua tagak dima tanduak lai ka makan. Babangun ka jalan jo jambatan tampek oto lari co patuih.
Oi tuak. Indak tau jo pakiak rakyaik tuak. Jo bauak bauak nda tau di buruak karajo datuak?
15 Februari 2018.