logo mak-adang.com

Ota Lapau (12) MALANCA KANAI ALUA.

 Dr. Andi Mulya, S.Pd., M.Si.     10/03/2023    Ota Lapau   160 Views
Ota Lapau (12) MALANCA KANAI ALUA.

Oleh:  Mak Uniang  A.S. Patimarajo

Kecek Malanca, niniak moyangnyo urang santiang. Sadonyo urang bisa diolah. Kutiko balawan jo Bulando, disimpainyo Bulando tu sampai tacilapak. Takalo zaman Japang, disabuiknyo urang Japang tu kakinyo pengka. Marasai kanai sipak.

Pokoknyo, ndak ado nan madok mukaluak bumi ko, ka niniak muyang Malanca. Urang Inggirih masak kucuah dek inyo. Urang Portugih, apo lai, lah bak jo inyo sajo. Urang Amerika sarato Nika tu lengkoang, ndak pandai lari. Murah sajo marabahannyo. Niniak muyang Malanca pandeka gadang. Mahia kumango jo taralak.

Sapatigo dunia bulek ko, punyo  muyang Malanca. Sabab tigo urang sajo, anak anduangnyo dulu tu. Sorang ka Banua Ruhun, sorang ka Guguak Cino, sorang lai ka Puncak Marapi. Nan ka puncak Gunuang Marapi itulah ninik muyang Malanca. Maharajo Dirajo.

Kapatang ko, ado anak urang Amerika jo nak rang Eropa taragak jo Malanca, keceknyo. Katonyo nak basuo ba muko muko. “Lah lamo wak ndak sobok, Nca. Taragak kami manambah ilemu dari Malanca ko mah. Sabab kaji nan dulu alun putuih dek kami lai,” kecek perwakilan mereka tu.

“Yo, ndak baa doh, kanti. Kamarilah ambo sadang di kampuang bana kini,” jawek Malanca malalui talepon ganggam.

“Jadih, Nca. Kami sadonyo 150 urang. Nan dulu baguru ka Malanca mah,” kecek urang tu maumbuak.

“Oh iyo. Ampia lupo ambo. Kini baru takana. Datang lah, Sanak. Beko basyair balagu lagu kito di tampek ambo. Basaluang saluang bagai. Pokoknyo, baandai bakucindan awak di kampuang ambo,” jawek Malanca sanang.

Ndak lamo sudah tu, tibo urang urang tu sarombongan gadang. Dijamulah dek Malanca sasuai jo adat nan tigo. Paratamu sambah manyambah. Kaduo baso jo basi. Ka tigo minun jo makan.

Salain daripodo itu, Malanca malagak takah urang kayo. Dibawok kawan kawan ko kuliliang nagari. Mancaliak jam gadang, mancaliak ngarai, mancaliak kelok 44, mancaliak danau bagai.

“Takah ikolah kampuang ambo. Nagari paliang rancak di dunia. Musajik paliang santiang di dunia. Randang paliang lamak di dunia,” kecek  Malanca.

Urang urang tu, maangguak angguak, takah yo bana.

Sasudah alek salasai. Kawan kawan ko lah baliak ka nagarinyo masiang masiang, sambia galak bagumam, mereka meneteang buah tangan ciek surang.

Pagi tadi sudah sumbayang subuah di musajik, Malanca bakisah ka Mak Uniang. Katonyo, inyo lah jadi guru sapakan kapatang ko, maaja urang lua nagari tantang budaya awak.

“Tarangah urang tu sadonyo, Mak. Mancaliak nagari kito ko, kagum bana mereka tu,” kecek Malanca bangga.

“Apo sajo nan waang aja an, ka inyo,” tanyo Mak Uniang.

“Banyak nan waden ajakan, Mak. Pokoknyo waden sampaian aa nan tantu dek waden. Tigo hari tigo malam, ilia labuah, sapanjang jalan, kami basyair bapantun pantun,” tarang Malanca.

“Padek tu, Nca. Balabo galeh tu? Bara sorang inyo mambayia ka waang?” tanyo Mak Uniang data.

“Ndak ado mereka tu mambayia doh, Mak. Awak manangguang sadonyo salamo di siko,” jawek Malanca.

“Yo, dermawan bana waang yo, Nca. Yo ba itu caro iduik ko. Suruah urang datang ka kampuang awak raun raun. Sadonyo awak manangguang,” kieh Mak Uniang.

“Kini biya awak rugi dulu, Mak. Isuak sakali lai awak alua sajo mereka itu lai,” siasek Malanca.

“Lah pandai Malanca mah. Tapi kini waang lah kanai alua dek urang urang tu,” pinteh Mak Uniang padek.

Malanca langsuang tagolek…

Leave a Reply

Your email address will not be published. Required fields are marked *

Terkait