Catatan  Harianku  (481)

PACU KUDO

Sabalun jadi tuak palo, pandeka nan babadan sagadang  tonggak kakui tapi tabek ko manjadi pareman di Balai Sotu. Di kapalo balai inyo duduak pagi sampai patang. Tapi dek pareman di balai nan rami, piti masuak lai ado taruih.

Alang barapo ari ko tuak palo la obi pulo bakudo. Pamainan rajo rajo saisuak. Modal bakudo bukan ajo piti nan banyak. Tapi juo kabaranian dan santiang. Smart baso panjajahnyo.

Alah tanamo dalam nagori, urang bakudo tau ereng jo gendeang. Tau pulo ma bandera  sira, kudo urang Agam. Ma pulo bandéra kuniang. Kudo urang Sangka. Tibo bapacu mako indak namo tuak palo nan disabuik do..tapi tunggangan nan didacaknyo. A namo kudo e.

Baitu pulo urang rami rakyaik badarai  Tando inyo dari Nagari Karamek Sangja inyo mamihak ka bendeea kuniang. Apolagi tibo kudo ko sadang bapacu… dan manang… tumbua la supakek sasamo urang nan bendera kuniang

Walau indak bakatauan… tapi sasamo dari Sangka inyo saraso basudaro. “He he lai kuniang juo bandera e,” baitu kato Mak Kawai manyapo Mak Adang nan samo manonton dan baru bakatuan di tana lapang pacu kudo.

Jadi indak sajo di nagari awak. Di nagari nan jauh pun urang mangarati  arti warana. Simbol simbol namo e.  Urang nan sawarna bandera e, mako bukan main padek pasatuannyo.

Tapi kini nagari la banyak barubah. Nan kuniang indak sajo bandéra bapacu kudo. Baitu pulo tuak palo jo nasibnyo kini. Walo la masuak galanggang..urang banyak alun juo amua tau jo kasantiangnyo.

Biaso main di Balai Sotu waang tuak… alun kalaih ang masuak ka galanggang gadang ko ba itu kece urang nan duduak manonton subalah Mak Adang.

La tigo kali rirayo tuak palo bakudo kini. Bandera kuniang lah jadi sabutan dek inyo. Apo lai sijak nagori la diatur sagalo bakaratu. Mambagiaan surek mancucuak wali nagori bakaratu. Maimbau urang bagotong royong bakaratu.  Iuran ayia nan acok mati pado iduk, bakaratu pulo. Peleen jo anak sakola dapek  piti dari rajo di pusek, juo kalua karatu.

Kini ko sokat sokat urang kayo la didata pulo dek tuak palo.. sia asnaf  nan lapan. Berhak dapek karatu sokat. Sasakali piti sokat  ko pulo nan dicukia-cukia dek tuak palo ko bisa diputa jadi pambali semen panuka jalan padati  jo jalan oto. Bak co patuih lari oto snek.

Satu kutiko pidatolah tuak palo baso inyo nan paliang santiang sijak nagari takambang buktinyo ko karatu nan kalua. Apolagi  pagi patang kini bebas main karatu.  Koa sampai pagi.

Baa jo karatu kuniang. Samo jo bendera bapacu kudo warana e.  O iyo ndak tontu den doh. Baitu kecek Mak Uniang manggamba kabingaan tuak palo ka Mak Adang pagi cako.

Jakarta, 3 feb 2018